Айсулу Еверхардт (Исхакова): Японияда квартиранын баасы 350 миң доллар

"Тагдырдын буйругу менен туристтер менен иштешип, ошол жерден болочоктогу жолдошумду таптым. Биз азыр эки татынакай баланы тарбиялап жатабыз"
  28.12.16   16:08
 885

Биз чет өлкөгө баарын таштап окууга, иштөөгө, жашоого, карьера кылууга, бала тарбиялоого, өзүн издөөгө жана башка үчүн кеткен адамдар тууралуу баяндамакчыбыз.

Жыл сайын жүздөгөн кыргызстандыктар биздин өлкөнү жакшы жашоо издеп таштап кетишет. Бул дүйнөнүн ар бурчуна тарап кеткен мекендештерибиздин баяны болмокчу. Алар чет өлкөгө барган кездеги кыйынчылыктары, башка менталитет, башка маданияттын өзгөчөлүгү жана бөтөн мамлекетте кандайча ийгиликке жетүүгө боло тургандыгы тууралуу пикир бөлүшмөкчү.

Айсулу Еверхардт (Исхакова), 27 жашта, үй кожойкеси,

Екосука, Япония:

-Кыргызстанда мен Кыргыз улуттук университетин каржы жана кредит адистиги боюнча бүтүргөм. Андан соң эки ай банкта иштеп бул жумуш мага ылайыктуу эмес экенин түшүндүм жана иштен кетип калдым. Англис тилин үйрөнө баштадым жана тагдырдын буйругу менен туристтер менен иштешип, ошол жерден болочоктогу жолдошумду таптым. Биз азыр эки татынакай баланы тарбиялап жатабыз.

Менин жолдошумдун жумушу аскер тармагы менен байланыштуу болгондуктан, биз көп учурда бир өлкөдөн экинчи өлкөгө барууга туура келет. Жана эң негизги нерсе - көчүп жүрүп өзүңдүн түпкү тамырыңды унутуп калбоо.

Японияга келгенге чейин биз эки ай Манилада жашап калдык. Филиппиндин абдан кооз жерлери, экзотикалык жер-жемиштери бышкан тропикалык аралдары көп.

Манилада эл көп, аба булганыч, аягы бүтпөгөн жол тыгындары жүдөтөт.

Мындан тышкары Филиппинде коом абдан бай жана аябай жарды деп экиге бөлүнүп калган. Өлкөнүн Кыргызстанга окшош жери - коррупция күчтүү. Японияда мындай көрүнүштү кездештире албайсың.

Келүүдөгү кыйынчылыктар

Башка өлкөлөр сыяктуу эле алгач Японияда туугандарым, досторум жок кыйналдым, бирок убакыттын өтүшү менен мындай жашоого дагы көнүп кетет экенсиң. Акырындап жаңы достор пайда болот дегендей. Чыныгы япондор менен дос болуу аябай кыйын, алар чет элдиктер менен дайыма аралыкты кармап турушат. Алардын арасында ушуга чейин башка улуттарга бөлүү сакталып калган, бирок алар муну эч качан бетиңе айтышпайт. Мындай учурлар менен көп кездешем.

Мисалы, Японияда япондор гана бара турган жерлер ресторандар, чач тарачтар, коомдук мончолор жана башкалар бар. Чет элдиктерди ал жактарга киргизишпейт. Мындан улам Токиодо чет элдиктер үчүн райондор пайда болгон, алар бул аймактарда өздөрүн жакшыраак сезишет жана япондордун мейкиндигин бузушпайт.

Тил жагынан кыйынчылык тарткан деле жокмун, мен япон тилин билбесем дагы англис тилин билем. Япон тилин үйрөнүү зарылдыгы бар деп ойлобойм, анткени дагы бир эки жылдан кийин биз башка жакка көчүп кетишибиз ыктымал. Бирок бактыга карай, япондуктар англис тилин бир аз билет. Ал эми билбесе үйрөнүүгө аракет кылышат.

Ооруканада эгерде дарыгер англис тилин билбесе, ага котормочу боло турган адамды таап беришет. Мындан тышкары мамлекеттик мекемелерде дагы англис тилин биле турган котормочу же кызматкерди табууга болот. Бул жагынан алганда Япония мага абдан жагат, бул жерде баары көңүлүңдү алганга аракет кылышат.

Калктын көпчүлүк бөлүгүн япондор түзөт. Бул өлкөдө жашаган чет өлкөлүктөр, айрыкча кыргыздар аз.

Калкы жана маданияты

Япон эли абдан меймандос ошол эле маалда, аябай жабык болушат. Анан калса японуктар өлөрчө иштешет. Эгерде жумуш күнү 10 саат болсо, 18 саат бою иштей беришет. Жумушчулар жумуш ордунан жетекчиси кетмейин кетишпейт, баары аны күтүп, андан ары да ишин уланта беришет.

Кыргыздар менен япондордун маданияты бир аз окшош. Биринчиден, менин байкашымча бул жерде улууларды сыйлашат, улууларга дайыма артыкчылык беришет.

Ошондой эле япондуктар абдан чынчыл калк келишет. Эгерде сиз метродо кол чатырыңызды унутуп кала турган болсоңуз, тапкычтар бюросуна кайрылсаңыз, аны кайтарып берүү ыктымалдыгы 90 пайыз деп койсок болот.

Билим берүү системасы

Япониянын билим берүү системасы бизге көндүм болуп калган системадан айырмаланат. Мисалы, Кыргызстанда баланы күнү бою бала бакчага берүүгө болот. Бул жерде баары башкача. Бала эң узак дегенде бала бакчада 6 саат болууга тийиш. Мамлекет баланы негизинен ата-энеси тарбиялаш керек деп эсептейт.

Азыр менин уулум эл аралык бала бакчага барат. Ал жерден япон, англис тилин үйрөнөт, а мен болсо ага үйдөн кыргыз жана орус тилдерин үйрөтөм. Өзүмдүн балдарыма биздин маданиятты үйрөтсөм дейм, кийин тагдыр кайда жөнөтпөсүн алар өздөрүнүн тарыхы менен салтын билишсе дейм.

Япон мектептери менен бала бакчаларында жыл сайын ар бир классты бири-бирине аралаштырып салышат. Бул бала эски класстан досторду таба албаса жаңы окуу жылдында таап алсын үчүн жасалат. Ошондой эле өз ара келише албаган балдарды дагы башка-башка класстарга бөлүп салышат.

Эгерде мугалим бала бир нерсе түшүнбөй жатканын көрүп калса, сабактан кийин калып аны окутат.

Япон мектептеринде жана бала бакчаларында ашкана жок, ошондуктан баары түшкү тамакты класстан жешет. Мектептерде окуучулардан турган нөөмөт тобу түзүлөт. Кимге нөөмөт туш келсе, ал көп жумуштарды аткарат. Ашканага барып тамак-аш салынган кутуларды жана милдеттүү түрдө сүт алып келет. Андан кийин алардын баарын тарелкага салып, атайын подностор менен окуучуларга таратат. Нөөмөттө турган окуучу ак халат менен баш кийим киет. Ушундай жол менен окуучуларды жоопкер болууга үйрөтүшөт.

Бала бакчаларда баары мектептегидей катуу эмес, бирок тарбиячылар кичинекейинен тартып эле баланы бул системага көндүрүшөт.

Окуу деңгээлинин айырмасы ар бир мектепте ар түрдүү. Жана жакшы акча төлөнгөн мектеп менен акысыз мектепти табыш үчүн балдарды бала бакчадан тартып эле атайын даярдоо курстарына жиберишет. Ошондой эле университетке өтүүнү каалаган окуучулар үчүн дагы мындай курстар бар.

Тамактануу жана спорт

Япондуктар өздөрүнүн ден соолугуна аябай жоопкерчилик менен кам көрүшөт. Алар негизинен жаңы бышкан жашылча-жемиштерди көп жешет.

Өзүмдүн үй-бүлөмө мен ар түрдүү тамактарды жасайм, бирок кыргыз ашканасынан жергиликтүү азыктарды колдонуу менен тамак даярдаганды жакшы көрөм. Ошентсе да даамы жагынан алганда тамактар Кыргызстанда жасалгандагыдай болбойт. Мындай учурда Бишкекке кетким келип кетет.

Жергиликтүү калк спорт менен активдүү машыгат, эртең менен чуркоого бара жаткан улгайган кишилерди көп көрөсүз. Бош убактымда мен дагы йогага барам, бирок көп убактымды балдарыма арнайм. Уулум сууга сүзүү менен машыгат, ал жерге эки жашынан тартып барып жүрөт. Кызым кичинекей, чоңойсо кайда жиберерибизди ойлонобуз.

Акча

Кыргызстанга салыштырганда Япония кымбат өлкө.

Анан калса көп каражат жөндөн-жөн эле короп кетет. Япондуктар баарын камсыздашат. Эгер кокус камсызданбай туруп ооруканага түшүп же аварияга учурап калсаңыз, андан көп акча төлөшүңүз ыктымал. 200 же 500 доллар эмес, 5000 доллардан ашык каражат сарп кыласыз. Ошондуктан Японияга келгиңиз келсе, биринчи кезекте туристтер үчүн убактылуу камсыздоо алыңыз.

Кыймылсыз мүлккө келе турган болсок, бул абдан эле кылдат маселе. Японияда ар бир сантиметрди эсептешет жана 3 бөлмө квартира алгыңыз келсе болжол менен 350 миң доллар коротосуз, бул жерде жайгашкан район дагы эске алынат.

3 бөлмөлүү квартира жалдаш үчүн ай сайын коммуналдык тейлөөдөн тышкары 2 миң доллар коротууга туура келет.

Мекендештер

Дал ушул Екосукадан мен кыргызстандык бир кызды тааныйм жана биз достошуп жүрөбүз. "Facebook" аркылуу дагы бир нече кыргызстандык кызды таап алдым, алар менен азырынча кат жазышып турабыз жана жолугуша элекпиз, анткени алар менден алыс жашашат.

Мен бул жердегилердин баары эле жан дүйнөсүндө Кыргызстанга кайтып барууну самашат болуш керек деп ойлойм. Албетте кааласаң биротоло кайтып кетүүгө болот, бирок жакын арада андай болбосун мен түшүнүп турам. Балким болочокто биз Бишкекке жашаганы барып калабыз. Азырынча ар бир эки жыл сайын мекениме кайтып барып биздин берметибиз болгон Ысык-Көлгө барып жүрөм.

URL: http://www.vb.kg/kabarordo/272104

 Комментарийлер:
#1 Эрлан
2017-05-08 22:22:55 Цитата / 0 / -

Мага япония жагат.мен 11-классты бутуп ошол жакта окуусам дейм. Мен японияга окууш учун эмне кылышым керек.

 

Биздин сайтта:
-сөгүнгөнгө
-бирөөнү мазактап, шылдыңдаганга, анын ичинде комментаторлордун дарегине
-ачык жана көмүскөдө коркутуп-үркүтүп, “сүйлөшкөнү чыккын” дегенге
-далилсиз жана күбөлөрдүн көрсөтмөсүз компроматтарды чыгарууга
-КРдын мыйзамдарына карама-каршы келген комментарийлирди жазууга
-транслитте жазылган комментарийлерди чыгарууга
-комментарийлерди чоң тамга менен баса белгилөөгө
-улут жана динге байланыштуу мазактоо, шылдың ирээтиндеги комментарийлерди жазууга болбойт.