Премьер: Түркия Кыргызстан үчүн негизги соода-экономикалык өнөктөштөрдүн бири

  09.08.17   13:27
 92

Премьер-министр Сооронбай Жээнбеков 8-августта, Түркиянын Анкара шаарында Түркия Республикасынын премьер-министри Бинали Йылдырым менен жолукту. Бул тууралуу өкмөттүн аппаратынын маалыматтык камсыздоо бөлүмү билдирди.

Өкмөт башчыларынын жолугушуусу алгач тар чөйрөдө өтүп, кийин сүйлөшүүлөр Кыргызстан менен Түркиянын өкмөттүк делегацияларынын катышуусунда кеңейтилген курамда уланды.

Жолугушууда билим берүү, маданият, айыл-чарба, жана соода-экономикалык өнөктөштүк тармагындагы эки тараптуу кызматташуулардын келечеги тууралуу сөз болду.

Түркиянын премьер-министри Бинали Йылдырым, Түркия достук мамиледеги Кыргызстан менен бардык тармактар боюнча, анын ичинде экономика, маданият жана билим берүү тармагында кызматашууга кызыкдар экенин билдирди.

Ал эки тараптуу алакаларды күчөтүү керектигин айтуу менен, жакын арада кыргыз-түрк соода экономикалык комиссиясынын кезектеги жыйынын өткөрүү зарылдыгына токтолду. Бинали Йылдырым эскерткендей, 1992-жылдан бери билим берүү тармагында 3500 студент Түркиянын алдыңкы жогорку окуу жайларында билим алган. 2016-жылы кыргызстандыктар үчүн 100 квота берилип, билим берүү тармагындагы программа уланууда.

"Сиздин Түркияга болгон сапарыңыздын алкагында Стамбул шаарында "Манас" эпосунун каарманына эстелик ачылып жатканы кубандырат. Бул жалпы түрк элинин маданий баалуулугу",- деди Бинали Йылдырым.

Премьер-министр Сооронбай Жээнбеков эки тараптуу дипломатилык алака башталгандан бери бардык тармактар боюнча кызматташтык динамикалуу өнүгүп келе жатканын баса белгиледи. Ал Кыргызстан боордош Түркия менен болгон мамилесин жогору баалап, анын мындан ары да бекемделишине кызыкдар экенин кошумчалады.

"Түркия Кыргызстан үчүн негизги соода-экономикалык өнөктөштөрдүн бири болуп саналат. Биздин өлкөлөр ортосунда соода-экономикалык жана инвестициялык байланыштарды күчөтүү зарыл",- деди Сооронбай Жээнбеков.

Бул үчүн кыргыз-түрк соода экономикалык комиссиянын ролу зор экенин билдирип, буга байланыштуу Бинали Йылдырымдын сунушун колдоп, комиссиянын кезектеги жыйынын эртерээк өткөрүү керектигин баса белгиледи.

Жолугушууда тараптар эл аралык уюмдар менен биргеликте маданий-гуманитардык багыттагы маселелерди чечүүгө кызыкдар экенин жана ал үчүн министрликтер менен ведомстволордун деңгээлинде эки тараптуу жолугушууларды өткөрүп, маселени ылдам чечүүгө болорун билдиришти. Түркия тарап Кыргызстандын маданият күндөрүн Кыргызстанга ыңгайлуу убакытта Түркиянын каалаган шаарында өткөрүүгө даяр экенин билдирди.

URL: http://www.vb.kg/kabarordo/276265

 Комментарийлер:
 

Биздин сайтта:
-сөгүнгөнгө
-бирөөнү мазактап, шылдыңдаганга, анын ичинде комментаторлордун дарегине
-ачык жана көмүскөдө коркутуп-үркүтүп, “сүйлөшкөнү чыккын” дегенге
-далилсиз жана күбөлөрдүн көрсөтмөсүз компроматтарды чыгарууга
-КРдын мыйзамдарына карама-каршы келген комментарийлирди жазууга
-транслитте жазылган комментарийлерди чыгарууга
-комментарийлерди чоң тамга менен баса белгилөөгө
-улут жана динге байланыштуу мазактоо, шылдың ирээтиндеги комментарийлерди жазууга болбойт.