РФ муфтийи Москвада мушташкандарга кайрылды
Орто Азия элдеринин ортосундагы чыр-чатак Россиянын аймагында болбошу керек. Бул тууралуу Россиянын коомдук палатасынын мүчөсү, РФ мусулмандарынын диний бирикмесинин башчысы Альбир Крганов маалымат жыйында билдиргенин РИА Новости жазды.
"Биз Орто Азия мамлекеттеринин айрым элдеринин ортосунда көйгөй бар экенин билебиз, жакында эле чыр-чатактарга да байкоо салдык. Бирок биздин өлкөнүн аймагында да жаңжалдашканына каршыбыз, мындайга жол бербей, мыйзам жүзүндө чара көрүлүшү керек. Алар Россия Федерациясынын мыйзамдарын сыйлап, буга байланыштуу чараларды көрүү зарыл", - деген муфтий.
Ал белгилегендей, мусулман дин кызматкерлери этникалык бирикмелердин лидерлерине мындай окуялар үчүн жоопкерчилик канчалык экендигин түшүндүрөт.
"Анын үстүнө биз көп улуттуу, көп диндүү мамлекетте жашайбыз... Кандай гана эмоциялар болбосун, маселелерди мыйзамдын чегинде гана чечүү керек", - деген Крганов.
Москвада кыргыз-тажик мигранттары мушташкан окуя 12-июлда кечинде катталып, массалык кармоолор болгон. Россиянын Ички иштер министрлигинин маалыматы боюнча, 102 мигрантты депортациялоо пландалууда. Массалык мушташта мигранттар жолго чуркап чыгышкан. Муну менен алар автоунаалардын жана коомдук транспорттун, жүргүнчүлөрдүн кыймылына тоскоолдук жараткан. Мигранттарды Россиянын аймагынан сыртка чыгаруу маселеси боюнча сот азырынча чечим чыгара элек.
