КАБМИНди ыңгайсыз абалга кептедиби?
Саламаттыкты Сактоо министри Алымкадыр Бейшеналиев И.Ахунбаев атындагы Кыргыз Мамлекеттик медициналык академиясынын ректорун шайлоону үзгүлтүккө учураткысы келген деп айыпталууда. Бул тууралуу журналист Тынчтык Алтымышев социалдык тармактагы өзүнүн баракчасынан билдирди.
Ал өз билдирүүсүндө Билим берүү министрлигинин стат-катчысы Калысбек Шадыканов 27-майда И.Ахунбаев атындагы Кыргыз Мамлекеттик медициналык академиясынын ректорун шайлоону токтотуу тууралуу буйрук чыгарганын, бул кадам аркылуу азыркы министр Алымкадыр Бейшеналиевге жылуу орун камдап жатканы тууралуу жазган.
Журналисттин билдирүүсүн төмөндө өзгөртөй беребиз:
"Мына сага бомба!!!
Бүгүн кечке маал дайындалып келген Билим берүү министринин стат-катчысы Шадыканов "бысмылда" деп эртеңкиге приказын чыгарды. Шок! Шок!
Көрсө ал кечээки шефи - саламаттыкты сактоо министри Алымкадр Бейшеналиевге жылуу орун даярдаш үчүн бул жакка келген тура!
Мыйзамдуу өтө турган МЕДАКАДЕМИЯнын шайлоосун артка жылдырып, анан Алымкадр акасын алып келмек тура.
Мобу приказга керек болсо, Купешов кол койбой жаткан дешет, билгендер!
Эми эртең медакадемиянын жамааты "комик ректордун кереги жок" деп митингге чыгат..."
Ошентип, Калысбек Шадыкановдун буйругунан кийин ректорду шайлоо убактылуу артка жылдырылат, бирок, шайлоо качан өтөрү азырынча белгисиз. Ал эми бүгүн, 28-майда КММАнын имаратынын жанында, медицина өкүлдөрүнүн жана студенттердин нааразычылык акциясы өтүп жатат. Алар ошондой эле учурдагы Саламаттыкты сактоо министри Алымкадыр Бейшеналиев КММАнын ректорун шайлоо жараянын үзгүлтүккө учуратууга аракет кылып жатат деп эсептешет. Митингчилер ректорду шайлоону жокко чыгаруу боюнча буйрукту жокко чыгарууну талап кылышууда.
КММАнын ректорун дайындоо жана ал жактагы Саламаттыкты сактоо министринин кийлигишүүсү менен болгон чуулгандуу окуя бир-эки күн мурун чыккан. Медициналык окуу жайдын өкүлдөрүнүн пикиринде министр Бейшеналиевге Саламаттыкты сактоо министрлигинин статс-катчысы Калысбек Шадыкановго окшогон өзүнүн адамы керек жана шайлоону өткөрүү боюнча уюштуруу комитетин жетектеп, аны үзгүлтүккө учуратууга аракет кылат.
КММАнын кызматкерлеринин кооптонуусу негиздүү. Саламаттыкты сактоо министринин акыркы кездерде жүрүм-туруму, жумшак айтканда, коомчулуктун гана эмес, ЖКнын депутаттарын да аң-таң кылууда. Жакында эле Жогорку Кеңештин депутаты Рыскелди Момбеков: "Саламаттыкты сактоо министрлигинин башчысы Кыргызстанды жаманатты кылды жана кетиш керек" деди.
Ал ошондой эле министрди кызматтан кетирүү боюнча депутаттардын чечимине карабастан, ал өз ордунда экендигин баса белгиледи.
- Бул жерде министрдин кызматтан алынышы үчүн 84 депутат добуш берди. 84 добуш менен президент жана башкы прокурор кызматтан кетиши мүмкүн. Эмнеге министрди жумуштан кетире албайбыз? – деп Момбеков ачууланды.
Ошондой эле көпчүлүктүн айтымында Министрлер кабинетинин бирден-бир туура чечими - Алымкадыр Бейшеналиевди тезинен Саламаттыкты сактоо министринин кызматынан алуу. Болбосо, бийлик анын катышуусу менен кезектеги катуу чуулгандуу окуяга тартылышы мүмкүн экенин айткандар арбын.
Ошол эле учурда, Бейшеналиев өзү университеттеги шайлоого байланыштуу кырдаалга кандайдыр бир деңгээлде таасир эте албайм деп ырастоодо. Анын айтымында, ал мындай билдирүүгө таң калып жатат.
"Министр жогорубы же ректорбу? Элестетип көрсөңүз, президент мага министр кызматын, алты түзүмдү - Социалдык фондду, Социалдык өнүгүү министрлигин, ММК фондун, миграцияны тапшырды, ошондо мен реформа, оптимизация жана коррупцияга каршы күрөштү жүргүзө алам. Анан мен кандайдыр бир ректорлук кызматка талапкерлигин коёмбу? Мен эч качанректорлукка атаандашпайм. Мен министрмин. Менин Медициналык академияга эч кандай тиешем жок. Шайлоону Билим берүү министрлиги өткөрөт", - деди министр.
