Назарбаев табылды! Аны менен Лукашенко сүйлөшкөн
Казакстандагы каршылык акциялары башталгандан бери биринчи жолу Казакстандын экс-президенти тууралуу маалымат чыкты.
Белорусиянын президентинин басма сөз кызматы тараткан маалыматка караганда, Лукашенко менен Назарбаев кечээ, 7-январда телефон аркылуу сүйлөшүшкөн.
"Сүйлөшүү учурунда Казакстандагы абалды талкуулашты", - деп айтылат маалыматта.
Белгилей кетсек, Казакстандын экс-президенти Нурсултан Назарбаевдин кайда экендиги, анын тагдыры кандай чечилгени тууралуу дагы деле маалымат жок.
6-январда анын үй-бүлөсүнө тиешелүү жеке учактын Бишкекке конгону тууралуу маалымат пайда болгон менен, аны расмий түрдө эч ким тактаган жок.
Эске салсак, 2-январда Казакстандын батышында суюлтулган газдын кымбатташына байланыштуу нааразылык акциялары башталган. Кийин нааразылык акциялары өлкөнүн башка аймактарына да жайылган.
Казакстандын бүт аймагында өзгөчө абал режими жарыяланып, коменданттык саат киргизилген.
