Бабановду жубайы менен жолуктурткан жок. Адвокаттар сотко кайрылышты
"Кумтөр" иши боюнча УКМКнын СИЗОсуна камалган экс-премьер-министр Өмүрбек Бабановдун жубайы Рита Бирбаева жана уулу Нуремир менен жолугушуусуна уруксат берилген жок. Бул тууралуу анын адвокаттары билдиришти.
Адвокаттардын айтымында, камакка алынган адамдын туугандары буга чейин жолугушууга арыз беришкен, бирок баш тартышкан.
Адвокаттар Кылмыш-процесстик кодексине ылайык, жакын туугандары менен жолугушууга соттун же тергөөчүнүн уруксаты менен гана жол берилерин эскертет.
Баш тартуу боюнча УКМКнын улук тергөөчүсү Дженбаев "тергөөнүн кызыкчылыгы үчүн Өмүрбек Бабановдун жактоочусунан башка адамдар менен жолугушуусуна уруксат берүү жагымсыз бойдон калууда" деп жазган.
Коргоочу тарап тергөөнүн чечимин адамкерчиликсиз деп атап, бул баш тартууну негизсиз деп эсептейт.
Адвокаттар тергөөчүнүн чечимине каршы сотко кайрылышты.
Өмүрбек Бабанов 2-июнда Бишкек шаарынын Биринчи Май райондук сотунун чечими менен камакка алынган. Ал "Кумтөр" кылмыш ишиндеги коррупцияга айыпталууда. Ал өзү айыптоолорду четке кагып, аларды "абсолюттук куру сөз жана абсурд" деп атады.
Эскерте кетсек, 15-майда Кумтөр Голд Компанинин кеңселеринде тинтүү жүргүзүлгөн. Кийинчерээк тергөө иш-чаралары коррупция фактысы боюнча козголгон кылмыш ишинин алкагында жүргүзүлгөнү белгилүү болду. УКМКнын башчысы Камчыбек Ташиев Кумтөр кенине байланыштуу төрт кылмыш иши бар экендигин айтты.
УКМК Кумтөр боюнча козголгон кылмыш иштерин иликтөөдө. Июнь айынын башталышы чуулгандуу камоолор менен коштолду. Парламенттин мурдагы жана учурдагы депутаттары Төрөбай Зулпукаров, Исхак Пирматов жана Талант Узакбаев УКМКнын СИЗОсуна эки айга камалды. Сот экс-премьер-министр Өмүрбек Бабанов менен парламенттин мурдагы спикери Асылбек Жээнбековду дагы камакка алды. Колдоочулары бул камакка алуулар саясий негизде деп эсептешет.
