Мамлекеттик органдар жана бизнес салык башкаруудагы жаңылыктарды талкуулады
16-декабрда Мамлекеттик салык кызматында салыктык башкаруудагы жаңылыктар боюнча жыйын өттү. Бул тууралуу Мамлекеттик салык кызматынын басма сөз кызматынан билдиришти.
Маалыматка ылайык, иш-чарага Экономика жана коммерция министрлигинин, Мамлекеттик салык кызматынын жетекчилери, бизнес-коомчулуктун өкүлдөрү жана ишкердик субъекттер катышты.
Жолугушуунун жүрүшүндө тараптар 2023-жылдын 1-январынан баштап жаңы техникалык талаптар менен контролдук-кассалык машиналарды, электрондук товардык-транспорттук коштомо кагазды колдонуу, ошондой эле пиво продукциясына электрондук акциздик марканы түшүрүү маселелерин талкуулашты.
Эске салсак, 2023-жылдын 1-январынан баштап салыктык башкарууда ишкердик субъекттер үчүн жаңы талаптар киргизилет.
Тактап айтканда, жаңы талаптарга ылайык фискалдык модулдук функциясы жок контролдук-кассалык машиналар 2022-жылдын 31-декабрына чейин гана колдонууга болот. ККМдин эски моделдери талаптарга жооп бербейт жана 2023-жылдын 1-январына чейин алмаштырууга (модернизациялоого) тийиш.
Товарларды жүгүртүүнү жүзөгө ашыруучу ишкердик субъекттер 2023-жылдын 1-январынан тартып Салык кызматынын маалыматтык системасында каттоодон өтүүгө жана электрондук товардык-транспорттук коштомо кагазды колдонууга милдеттүү.
Жолугушуунун жыйынтыгында тараптар мындай жолугушууларды туруктуу негизде өткөрүүнү чечишти, анда тигил же бул салык маселелерин талкуулоого жана алар боюнча конкреттүү чараларды көрүүгө болот.
