COVID-19 башталгандан бери Кыргызстанда 1 миң 650 бала ооруп, 6 көз жумду

Кыргызстанда коронавирус башталгандан бери 1 650 бала вирус жугузуп, анын ичинен алтоо каза болгон. Бул тууралуу Республикалык штабдан кабарлашты.

Алар ооруну кандай абалда көтөрүшкөн:

канааттандырарлык - 58 пайыз;

орточо оор - 22,5 пайыз;

оор абалда - 17,5 пайыз;

өтө оор абалда - 2 пайыз.

Балдардын жаш курагы:

1 жашка чейин – 263 (16 пайыз);

1 жаштан 4 жашка чейин – 512 (31 пайыз);

5 жаштан 15 жашка чейин – 685 (41,5 пайыз);

16 жаштан 18 жашка чейин – 190 (11,5 пайыз).

Бүгүнкү брифинг учурунда Эне жана баланы коргоо улуттук борборунун директору Гүлзат Маймерова балдар да чоңдор сыяктуу эле коронавируска кабылылып жатканын, бирок аз санда экенин айтты.

"Балдар COVID-19ду жеңил өткөрүшөт, алардын арасында симптомсуз жана оорунун жашыруун формаларын алып жүргөндөр бар. Мындай балдар ачык симптомдору менен ооруган чоңдорго караганда инфекцияны көбүрөөк алып жүрүшөт", - деди ал.

Балдар арасында коронавирус жугузуп стационарга түшүп калгандардын саны Бишкек, Ош шаарларында жана Чүй облусунда баарынан көп.

Бишкек шаары – 573;

Чүй облусу – 267;

Ош облусу – 262;

Ысык-Көл облусу – 135;

Жалал-Абад облусу – 114;

Ош шаары – 109;

Нарын облусу – 98;

Баткен облусу – 73;

Талас облусу – 19.

Республикалык штабдан кошумчалашкандай, 2020-жылдын жаз айларында дүйнө жүзү боюнча ооруган балдардын саны жалпы статистиканын 0,8-2 пайызын түзсө, учурда вирус жугузуп алгандардын 11-14 пайызы жаш балдар болуп эсептелет.