Кыргызстанда баңгизат менен күрөшүүгө 10 млн доллар бөлүнөт

Тышкы иштер министринин орун басары Динара Кемелова БУУнун Баңгизаттар жана кылмыштуулук боюнча башкармалыгынын Борбор Азиядагы аймактык өкүлү Ашита Миттал менен жолугушту.

ТИМдин басма сөз кызматы билдиргендей, жолугушуунун жүрүшүндө тараптар трансулуттук уюшкан кылмыштуулукка, терроризмге, экстремизмге, баңги заттарды мыйзамсыз жүгүртүүгө жана коррупцияга каршы күрөшүү боюнча кызматташууну талкуулашты.

Ашита Миттал 2022-2025-жылдарга Борбор Азия мамлекеттери үчүн программаны жүзөгө ашыруу алкагында Кыргызстанда Баңгизаттар боюнча башкармалыгынын долбоордук иш-чараларын ишке ашырууга 10 млн доллар бөлүнөрүн билдирди.

Аны менен бирге тараптар чек ара өз ара аракеттенүү кеңселерин түзүү аркылуу Борбор Азиядагы чек аралар аралык кызматташтыкты чыңдоого, өткөрүү пункттарынын дараметин бекемдөөгө, кинологиялык дараметти күчөтүүнү талкуулашты.

Жолугушуунун соңунда тараптар 2022-жылдын ноябрында Бишкек шаарында баңги заттарды мыйзамсыз өстүргөн аймактарга мониторинг жүргүзүү жана талдоо жүргүзүүнү макулдашты.


Сообщи свою новость:     Telegram    Whatsapp

НАВЕРХ  
НАЗАД