Баткенде гумжардамды кабыл алуу жана бөлүштүрүү боюнча жумушчу топ түзүлдү
Баткен районунда облустун калкына гуманитардык жардамдарды кабыл алуу жана бөлүштүрүү иштерин уюштуруу үчүн жергиликтүү өз алдынча башкаруу органдарынын өкүлдөрүнөн, жергиликтүү активисттерден жана волонтерлордон турган жумушчу топтор түзүлдү. Бул тууралуу КР президентинин Баткен облусундагы ыйгарым укуктуу өкүлүнүн орун басары Жаныбек Исаков билдирди.
Анын айтымында, гуманитардык жардам төмөнкү алгоритм боюнча бөлүштүрүлөт:
Өзгөчө кырдаалдар министрлигинин өкүлдөрү келип түшкөн жүктөрдү арыздын негизинде ыйгарым укуктуу жергиликтүү өз алдынча башкаруу органдарына беришет;
андан ары жергиликтүү өз алдынча башкаруу органдарынын жумушчу топтору (акимдер, мэрлер) айыл өкмөттөрүнүн өкүлдөрүнө гуманитардык жардам беришет;
жыйынтыктоочу этап: айыл өкмөтүнүн жумушчу топтору жеринде жарандарга тамак-аш жана эң керектүү буюмдарды бөлүштүрүшөт.
Жергиликтүү бийлик өкүлдөрүнөн, активисттерден жана ыктыярчылардан турган жумушчу топтордун ишинин мындай принциби гуманитардык жардамды муктаж болгон бардык жарандарга бирдей жана даректүү бөлүштүрүүнү камсыз кылат.
Гуманитардык жардамды бөлүштүргөндөн кийин ар бир жумушчу топ гуманитардык жардамдын бөлүштүрүлгөн жери жана күнү, которулган жардамдын иш жүзүндөгү көлөмү жана бөлүштүрүлбөгөн гуманитардык жардамдын калган калдыктары жөнүндө маалыматтарды камтыган протокол түзөт.
Ж.Исаков белгилегендей, гуманитардык жардамды өз убагында бөлүштүрүү боюнча иштерди сапаттуу уюштуруу үчүн ЖӨБ органдарынын жетекчилери жооптуу.
Мындан тышкары, товарларды, анын ичинде тез бузулуучу азыктарды убактылуу сактоо үчүн арналган жайлар же участоктор жооп бериши керек болгон критерийлер белгиленген.
Бүгүнкү күндө Баткен облусуна 1053 тонна гуманитардык жардам жеткирилди.
Эске салсак, кыргыз-тажик чек арасындагы куралдуу кагылыштан жапа чеккен Баткен облусунун калкы үчүн республика боюнча гуманитардык жардамдарды кабыл алуу пункттары уюштурулган.
