Ысык-Көлдө эс алуу учурунда жоголгон балдар аман-эсен жакындарына өткөрүлдү
Ысык-Көлдө эс алуу учурунда жоголгон балдар аман-эсен табылып, жакындарына өткөрүлүп берилди. Бул тууралуу ИИМдин Атайын багыттагы полкунун басма сөз кызматынан билдиришти.
Маалыматка караганда, Ысык-Кѳл облусундагы "Кыргызское взморье" эс алуучу жайда жоголгон 5 жаштагы кыздын ата-энеси милиция кызматкерлерине жардам сурап кайрылган. Ошол замат ИИМдин Атайын багыттагы полкунун 1-батальонунун кызматкерлери милициянын сержанты К.Эсенкожоев жана милициянын кенже сержанты М.Майрамбеков эс алуу жайынын айланасынан издешип, кечки саат 21:15 чамасында кызды таап аман-эсен ата-энесине ѳткѳрүп беришкен.
Ушундай эле кѳрүнүш "Көгүлтүр Ысык-Кѳл" эс алуу жайында да орун алган. Анда 10 жаштагы эгиз кыздар жоголуп кеткендиги тууралуу маалымат түшүп, полктун 1-батальонунун кызматкерлери милициянын прапорщиги Н. Кулданбаев, милициянын старшинасы Э.Эркебаев, милициянын улук сержанты Б.Тагылыков жана милициянын кенже сержанты О.Баратов издѳѳ иштерин жүргүзүп, табылган эгиз кыздарды туугандарына ѳткѳрүп беришкен.
Эл-жери үчүн күн-түнү кызмат ѳтѳп жарандардын коопсуздугун жана коомдук тартипти камсыздап жаткан полктун кызматкерлерине кыздардын ата-энеси жана туугандары терең ыраазычылыктарын билдиришти.
