Шин мамлекеттик айыптоочу менен макул: Ташиев бийликти басып алууну каалаган
"Ата-Журт" фракциясынын депутаттары Камчыбек Ташиевди, Талант Мамытовду жана Садыр Жапаровду мыйзамдуу түрдө камаган. Мындай пикирин "Ата-Журт" фракциясынан чыккан депутат Роман Шин "ВБ"га берген маегинде билдирди.
Анын айтымында кармалган эл өкүлдөрү бийликти басып алууну ойлогон, "бирок алардын ою ишке ашкан жок".
"Мен кореймин, титулдук улут болбогон бизге стабилдүүлүк абдан керек. Биз аны сактоого бардык аракетти көрөбүз. Жапаров, Ташиев жана Мамытов ашыкча кетти. Чындыгында алар бийликти конституцияны бузуп тартып алабыз деген ою коомду мурда эле тынчсыздандырган", - дейт Шин.
Эске салсак, 3-октябрда "Кумтөрдү" улутташтыруу боюнча уюштурулган митингге 2 миңдей адам катышкан. Анын уюштуруучу Садыр Жапаров болгон. Алар чечкиндүү кадамдарга бара турганын айтышкан.
