"Кыргыз – казак бир тууган" тасмасы тартылат
8-апрелден баштап, жакында тартыла турган "Кыргыз – казак бир тууган" аталыштагы тасмага кастинг жарыяланган. Кинонун режиссеру Нарлан Абдыкадыров. Абдыкадыровдун айтымында бул алгач пьеса болуп жаралган, бирок проект ишке ашпай калган. Кийин пьеса кино-сценарий болуп жазылып, эми тартылганы турат.
"Тасма көргүлүктүү жана ийгиликтүү болооруна ишенем, жана Россия менен Казакстандагы кыргыз мигранттарына болгон мамиле аз болсо да өзгөрөт деген пикирдемин", – дейт режиссер.
Сюжеттин өзөгүндө - Ихтиандр атту алматылык студент жана анын сүйлөшкөн кызы Диана экөөнүн кызыктуу окуялары камтылган. Жигит Кыргызстанда, ал эми селки Казакстанда туулган. Үйлөнүү тойун бергенге чейин кош жүрөктөр жана алардын ата-энелери башынан көп нерсени өткөрүшөт. Комедия жанрындагы тасма Бишкек, Алматы жана Ысык-Көлдө тартылат.
