Депутат ашынган педофил-кылмышкерлерди физикалык бычууну сунуштады
Жогорку Кеңештин сот-укуктук маселелер жана мыйзамдуулук боюнча комитети педофилдерге карата жазаны катаалдатуу боюнча мыйзам долбоорун карашты.
КСДП фракциясынын депутаты Данияр Тербишалиев педофилдерге карата физикалык кастрация жасоону сунуштады.
"Ашынган педофил-кылмышкерлерди мажбурлап туруп бычуу керек. Ошондо гана өспүрүмдөрдүн коопсуздугу кепилденип, ушул өңдүү кылмыштардын саны азаят", - дейт ал.
Андан сырткары, Тербишалиев зордукчуларды балдары жабыр тарткан салык төлөгөн ата-энелердин эсебинен бычуу туура эмес деп эсептейт.
"Ар-Намыс" фракциясынын депутаты Дастан Бекешев педофилдери физикалык жактан бычуу өтө опурталдуу экенин белгилейт.
Анын айтымында, соттун чечими дайыма эле туура болбогондуктан, кээде зордукчуларга тагылган күнөө тастыкталбай калышы мүмкүндүгүнөн физикалык бычуу кооптуу.
