Малга "ыңгайлуу бирка" сатып алууну сунуштап жатышат
Бүгүн, 3-апрелде, парламенттик жыйында "Ата-Журт" фракциясынан депутат Абдымиталип Кочкорбаев мал-жандын идентификациясы үчүн "жарактуу биркаларды" сатып алууну сунуштады.
Жыйында айыл чарбадагы мал-жандын идентификациясы тууралуу мыйзам долбоор каралып жатат.
Кочкорбаевдин айтымында, биркалар ыңгайлуу болушу шарт. "Биркалар чырпык, бутактарга илинбей, көлөмү чакан болгону жакшы. Аларды тендер жолу менен тандаганыбыз оң болот", - деди ал.
"Мал-жанды идентификациялоо мыйзамын биз сөзсүз кабыл алышыбыз керек. Мындай долбоор бизге керек. Эгер анда кандайдыр бир мүчүлүштүктөр бар болсо, бара-бара оңдоп түзөп алабыз", - деп спикер Асылбек Жээнбеков кошумчалады.
Талкулоонун натыйжасында, добуш берүү менен мыйзам долбоор экинчи окууда каралааары белгилүү болду.
